KORTNUUS 11
2008/08/22

Hierby aangeheg is korrespondensie, wat die eenheidsproses in die NG Kerk familie intens raak.

 

Lees dit asseblief en gee dit verder deur.  Môre lees almal dit waarskynlik in die koerante.

 

 

Baie groete

 

HENRY VAN DER SCHYFF

 

From: Sentrum vir Kommunikasie

 

Kollegas,

 

Hieronder – en aangeheg – die korrespondensie tussen die VGKSA en NGK na aanleiding van die NGK se aansoek om lidmaatskap by die All Africa Council of Churches (AACC). Volgens die vereistes vir so ’n aansoek is die VGK saam met ander lidkerke gevra om die NGK aan te beveel by die ekumeniese organisasie.   Die VGK het nie sy weg oopgesien om dit te doen nie, oor redes wat in hulle skrywe aangedui word (sien aangeheg).  Op sy afgelope Moderamen-vergadering van die Algemene Sinode, is ’n antwoord aan die AACC geformuleer, wat ook aan die VGKSA gestuur is (ook aangeheg).

 

Hierdie hele rampspoedige gebeurtenis sal verrykende gevolge hê vir die kerklike verhoudings in die NG Kerkfamilie.  Dit gaan na alle waarskynlikheid van môre af wyd in die openbare media berig word.  Die hele gebeurtenis is uitermate sleg vir die getuienis van die Christen-geloofsgemeenskap na buite.

 

Sodat ons lidmate nie hierdie inligting eerstens via die openbare media verneem nie, word hierdie inligting onmiddellik deurgegee vir verspreiding in gemeentes.  Op hierdie manier kan hulle hulleself eerstehands vergewis van die inhoud en oorwegings van die kerke ter sprake.

 

Vriendelike groete.

Ben du Toit

 

NS  Die dokumente sal as ’n eenheid ook op die NG Kerk se webwerf geplaas word.

 

Dr Ben du Toit

Redakteur Elektroniese Kommunikasie Algemene Sinode NG Kerk

 

From: Kobus Gerber [mailto:KobusG@ngkerk.org.za]
Sent: 21 August 2008 08:08 AM
Subject: BRIEF AAN VGKSA OOR DIE AACC

 

Liewe kollega

 

Aangeheg is die Moderamen se antwoord op die VGKSA se brief.  Ek heg die Afrikaanse weergawe (as basisdokument) aan.  (Die Engelse vertaling is ook beskikbaar.)

 

Ons Moderamen het op 20 Augustus 2008 ook nog die volgende besluit geneem:

 

Die Algemene Sinode se Moderamen is opreg jammer dat die proses ten opsigte van kerkhereniging nie so vlot loop soos al die deelnemers dit graag sou wou hê nie.  Ons bevestig weereens ons verbintenis tot kerkeenheid as die wil van God vir sy kerk, en onderneem om steeds voort te gaan met gesprekvoering om die proses steeds op dreef te hou.

 

Die Moderamen het verder besluit om, soos ons ooreengekom het by die Bybelhuis op 12 Augustus 2008, in ’n skrywe aan die WARC die moontlikheid van fasilitering op te volg.

 

Ek bid saam met jou dat die Here ons regtig genadig sal wees.

 

Seën toegebid op jou bediening en werkkring.

 

Vriendelike groete

 

Dr Kobus Gerber

Algemene Sekretaris / General Secretary

Nederduitse Gereformeerde Kerk / Dutch Reformed Church

 

NEDERDUITSE GEREFORMEERDE KERK

 

20 Augustus 2008

 

Die Algemene Sekretaris

Verenigende Gereformeerde Kerk in Suider-Afrika

Posbus 41102

Eersterust 0022

 

Beste Collin

 

AANSOEK OM LIDMAATSKAP VAN DIE AACC

 

Die Moderamen van die Algemene Sinode van die NG Kerk het tydens sy vergadering van 19-20 Augustus 2008 die brief van die VGKSA, gedateer 4 Augustus 2008, waarin die NG Kerk meegedeel word dat die VGKSA nie sy weg oopsien om die NG Kerk as lid van die All Africa Conference of Churches (AACC) aan te beveel nie, in behandeling geneem.

 

Uiteraard het die VGKSA se antwoord ons geskok en het dit vir ons duidelik geword dat ons oor die verloop van die historiese proses verskil.

 

1. Volgens die brief van die VGKSA het die Wêreldbond van Gereformeerde Kerke (WARC) by Debrecen en soos herbevestig by Accra vereis dat “unification” en “the inclusion of Belhar Confession” die lakmoestoets moet wees vir die antwoord op die vraag of die NG Kerk afgesien het van apartheid.

 

Dit is vir ons duidelik dat die VGKSA, teen ons verwagting in, nie dink dat ons daarin geslaag het om van apartheid af te sien nie.

 

Die feit is natuurlik dat die NG Kerk reeds in 1998 hertoegelaat is as volle lid van die WARC en dat die WARC op dié punt ’n ander weg gevolg het as die een in die brief van die VGKSA. WARC het duidelik aangedui wat die voorwaardes vir hertoelating was, en daaraan het die NG Kerk voldoen. WARC wys trouens in die pastorale brief aan die NG Kerk daarop dat die NG Kerk se betrokkenheid (“engagement”)  by die proses van kerkhereniging ’n betekenisvolle teken is van ons wegkeer van apartheid.

 

Ten opsigte van Belhar is die hoop uitgespreek dat ons studie daarvan ons toenemend sal help verstaan waarom ’n status confessionis uitgeroep is, en dat ons dit in die lig daarvan in die herenigde kerk eendag kan bely.  Die Algemene Sekretaris van die WARC het dit by die Algemene Sinode van 1998 duidelik gestel wat die wens van die WARC is, maar dat die WARC op geen manier ’n belydenisskrif op ’n lidkerk kan forseer nie.  Ons heg by hierdie skrywe drie dokumente aan: (1) Die Joint Resolution  tussen die NG Kerk en WARC, (2) die Pastoral Letter  van die WARC, en (3) die toespraak van die Algemene Sekretaris van die WARC tydens die Algemene Sinode 1998.

 

2. Die Moderamen van die VGKSA maak die aanvaarding van Belhar die toets of die NG Kerk afgesien het van apartheid. Daarom bepaal die aanvaarding van Belhar, wat die VGKSA betref, ook die ekumeniese aanvaarbaarheid van die NG Kerk. As dit waar is, is die vraag of die NG Kerk die enigste ander kerk is op wie die VGKSA dié vereiste van toepassing maak. Die WARC het by die NG Kerk aangedring op die aanvaarding van ’n status confessionis teen die teologiese regverdiging van apartheid (wat ons onomwonde en ondubbelsinnig gedoen het), maar toegegee (vgl pt 1 hierbo) dat ’n geloofsbelydenis nie noodwendig uit so ’n stap hoef te vloei nie en dat niemand gedwing kan word om ’n belydenis te onderskryf nie.

 

Ons versoek die Moderamen van die VGKSA om vir ons te verduidelik wat hulle met “the inclusion of Belhar” bedoel. Verstaan ons reg dat die VGKSA, teen die bedoeling van Esselenpark en die bedoeling van ander ooreenkomste in (vgl die aangehegte ooreenkoms tussen die twee Moderature in Februarie 2008.  Ons weet dat die VGKSA later met bepaalde voorstelle vir wysiginge hieraan gekom het wat nog nie deur die twee Moderature bespreek is nie), dit tog ’n voorwaarde vir kerkeenheid maak. Hierop vra ons ’n eenvoudige, duidelike antwoord aangesien ’n voorwaarde tog iets anders is as die voorneme om Belhar in ’n nuwe kerkverband aanvaar te kry.

 

Ons het per ooreenkoms met mekaar en ons lidmate aan die einde van 2007 ons gemeentes gekonsulteer.  Hieruit het dit geblyk dat die Belydenis van Belhar vir die meerderheid gemeentes en lidmate in die NG Kerk nie as vierde belydenisskrif aanvaarbaar is nie, terwyl kerkhereniging vir die meerderheid gemeentes en lidmate belangrik is.

 

Volgens ons kan daar kwalik geargumenteer word dat indien lidmate nie Belhar as belydenis wil aanvaar nie dit ’n voortsetting van apartheid beteken.

 

3. Die VGKSA bring in hulle brief weer apartheid te berde.  Dit is vir ons hartseer, amper onaanvaarbaar, dat die VGKSA nie erkenning gee aan die veranderinge wat wel in die NG Kerk plaasvind nie.  In die NG Kerk is daar persone van kleur (indien ons nog van kleur moet praat) in al drie die besondere ampte, daar is talle gesamentlike pastorale bedieningspunte tussen die NG Kerk-gemeentes en gemeentes van die NG Kerkfamilie waar bedienings integreer is.  ’n Baie groot getal van ons gemeentes het gekleurde lidmate/ gereelde erediensbywoners (twee van ons sinodes: die Vrystaat ongeveer 40% van die gemeentes en Wes-Transvaal ongeveer 50% van die gemeentes.  In ’n gemeente in laasgenoemde sinode het daar byvoorbeeld onlangs 40 mense van kleur belydenis van geloof afgelê).

 

4. Die VGKSA oordeel dat die optrede van die NG Kerk in die herenigingsproses  “contrary to the spirit of the Esselenpark Declaration”  is. Ons sal bly wees as die VGKSA die bewering aan ons sal verduidelik aangesien ons nie oordeel dat die NG Kerk wegbeweeg het van die gees en proses wat uit Esselenpark gevloei het nie.

 

By Esselenpark het die NG Kerk en die VGKSA ook ooreengekom dat die proses nie sonder die ander twee kerke moet plaasvind nie. Die Esselenpark-verbintenis het in Augustus 2006 gelei tot ’n nuwe verbondsverbintenis tusssen al vier kerke van die Familie van NG Kerke: Die vier Moderature het eenparig ’n verbondsverbintenis aangegaan ten opsigte van die hereniging van die NG Kerk-familie. Versoening sal ’n onontbeerlike faset van die proses van hereniging tussen ons wees. Ons gebruik die woord “verbondsverbintenis” omdat ons onsself en die proses van eenwording onder die gesag van die woord van God en die wil van Christus wil bring.  Ons maak die verbintenis nie uit onsself nie en ook nie onder die druk van politieke en sosiale prosesse nie, maar doen dit omdat ons glo dat die Here wat Hom in genade aan ons verbind het dit van ons vra.   

 

Al vier kerke, die VGKSA, die NGKA, die RCA en die NG Kerk, is in Bloemfontein in Augustus 2006 aanvaar as volwaardige lede van die eenheidsproses, en ons word nou almal gebind deur die nuwe verbondsverbintenis  van Bloemfontein.

 

Natuurlik sal Esselenpark altyd die gebeure wees wat gesorg het vir die deurbraak in die proses, en sal die NG Kerk dit ook altyd as sodanig koester. Daar het egter in die gees van Esselenpark twee ander vennote bygekom.

 

5. Die VGKSA stel dat hulle “experience of the unification talks” met die NG Kerk die rede is om die NG Kerk te weerhou om sy totale verbintenis met Afrika ook in AACC uit te leef. Dit was vir ons nuus!  Ons verstaan nie waarom die gesprek nie by vorige geleenthede waar ons mekaar ontmoet het, byvoorbeeld Junie 2008, op die tafel was nie.

 

6. Ons het die beskuldiging gehoor dat die NG Kerk die doelpale vir kerkhereniging verskuif.  Dit staan klaarblyklik in verband met ons konsultasieproses, die reaksie van ons gemeentes op Belhar soos persoonlik oorgedra aan die VGKSA se Moderamen in Junie 2008, asook ons voorstelle vir ’n weg vorentoe.

 

Die Moderatuur van die VGKSA beweer dat die NG Kerk ’n ooreenkoms oor die konsultasieproses verbreek het omdat ons nie met mekaar oor die praktiese uitvoering gekonsulteer het nie.  Volgens ons oordeel is by Achterbergh II ooreengekom dat die vier kerke die dokumente aan hulle gemeentes stuur vir kommentaar.  Dit het ons gedoen.

 

As ons gemeentes en lidmate se reaksie verskil, of uitwys dat hulle nie saamstem met ons voorstelle nie, beteken dit mos nie dat die doelpale verskuif is nie.

 

Die voorstelle wat ons Moderatuur in Junie aan die Moderamen van die VGKSA oorgedra het, was bloot ’n voorstel vir verdere onderhandelinge. Dit kan uit ons kerkregtelike verstaan niks anders wees as voorstelle nie, soos wat dit ook in ons brief weergegee is.  Ons is in ’n onderhandelingsproses as vier kerke met mekaar waar elkeen hulle voorstelle bring.  Indien ons die uitkoms van ons konsultasie tafel toe bring, beteken dit nie ’n verskuiwing van doelpale nie, maar is dit slegs die resultaat van ons konsultasieproses.

 

Die NG Kerk het ook nog nie terugvoering van die VGKSA, die NGKA en die RCA oor hulle konsultasieproses gekry nie. Dit is vir die NG Kerk belangrik om te hoor wat die VGKSA se gemeentes oor die vier punte van Achterbergh II sê.

 

7. Dit lyk vir ons asof die VGKSA hulle weiering tot aanbeveling vir toelating van die NG Kerk by die AACC op wanvoorstellings baseer.  Moderatuurslede van die VGKSA het by die WARC-gesprek op 12 Augustus 2008 dieselfde gedoen – dit was vir ons ’n groot skok en ’n verleentheid vir almal.

 

8. Die NG Kerk glo dat die eenheid in Christus dit vir ons moontlik maak om met mekaar eerlik oor knelpunte te praat.  In die lig van ons geskiedenis sal dit nie ’n geloofwaardige eenheid wees as ons nie oor ons verskille met mekaar praat nie.  Ons oordeel dat sonder ’n omgee vir mekaar se belange en ’n aanvaarding van mekaar se goeie trou kerkeenheid in die NG Kerkfamilie moeilik sal slaag.

 

Ons het by Achterbergh I & II ons verbintenis tot die eenheidsproses beklemtoon en ons doen dit nou weer.

 

9. Ter wille van deursigtigheid in ons gesamentlike proses stuur ons die VGKSA se brief aan ons en ons antwoord daarop aan die hele Familie, nl die NGKA en die RCA.  Vanweë ons verleentheid en ter wille van deursigtigheid stuur ons die twee briewe ook aan die sekretariaat van die AACC, die WARC, die GER, RESAC asook die SARK en vertrou dat hulle vir ons sal bid en moontlik kan bemiddel.

 

10. Hierdie brief is deur die volle Moderamen van die NG Kerk op 19-20 Augustus 2008 goedgekeur.

 

Vriendelike groete

 

Dr JJ Gerber

Algemene Sekretaris: NG Kerk

 

 

 

 

 

 

Die uitdrukking “status confessionis” beteken nie as sodanig dat dit tot ’n formele belydenisskrif moet lei nie.  Die woorde: (die Ned Geref Kerk) “... rejects apartheid as wrong and sinful not simply in its effects and operations but also in its fundamental nature” is al ’n belydenis wat vanuit ’n geloofsperspektief gedoen word.

 

 

 

 

Verenigende Gereformeerde Kerk in Suider Afrika

 

The General Secretary

Dutch Reformed Church

General Synod

Hatfield

Pretoria

 

Dear Dr Kobus Gerber

 

APPLICATION MEMBERSHIP OF AACC

 

The moderamen of the URCSA General Synod has noted your request for a letter of support in your application for membership of the All Africa Conference of Churches.  It is however with regret that we have to reply that in the light of on our experience of the unification talks we cannot in all honesty and with a clear conscience recommend you for membership of the AACC.  Up to now the basis on which even WARC readmittance was gained, which stipulated that unification and the inclusion of Belhar Confession becomes the acid test for the departure of the DRC from apartheid made at Debrechen and reiterated in Accra has not been fulfilled.  Contrary to the spirit of the Esselenpark declaration, the last communication by the DRC leadership has dashed our hopes that this issue will be resolved soon.  So, we are really sorry that URCSA is not in a position to recommend your application at this time.

 

 

Yours in Christ

 

Rev Collin Goeiman (Scribe General Synod)

Cell no: +27 82 293 2640

Druk      Stuur hierdie nuusartikel na 'n vriend

---