Oostelike Sinode

Aan die begin van 2009 praat ons oor baie belangrike goed: die wêreld-ekonomie; die oorlog in Israel; die krisis in Zimbabwe.  Ook oor die groot politieke verkiesing wat vir ons in Suid-Afrika voorlê; armoede en vigs.  Amper soos die golwe wat oor die Christusgelowiges van die jaar 55, 56nC gespoel het.  Die hele Romeinse wêreld is deurmekaar, nasies begin in opstand kom teen die verdrukking en swaarkry en uitbuiting.  In Rome self is die situasie byna onuithoudbaar vir die Christene.  In hulle katekombe-skuilings vrees hulle elke dag vir hulle lewe; hulle kry swààr!

Paulus is ten volle daarvan bewus, want hy sien al hierdie goed raak soos wat hy deur Klein-Asië reis.  Op hierdie stadium is hy in die wêreldstad Korinte, op sy derde sendingreis.  Hy draai sy lesers in Rome se oë na die toekoms om die onsienlike te sien: die koms van die Here Jesus, want dit het ‘n impak op hulle – en op jou en my lewe!  Ons wat elke dàg behoort te lewe in die lig van Sy koms.

“Jesusmense, wil hy sê, moenie teen die golwe van die dag vas kyk nie!”  Mag dit ook in Oostelike Sinode hierdie jaar so wees dat ons vorentoe lewe, in die lig van Sy koms: Mag God, die bron van hoop, julle deur julle GELOOF met alle VREUGDE en VREDE vervul, sodat julle HOOP al hoe sterker kan word deur die KRAG van die Heilige Gees!  Romeine 15:13.

Johan van Schalkwyk