Oostelike Sinode

Liewe Broers en Susters in die familie van Oostelike Sinode!

Ek vetrou dit gaan baie goed met julle elkeen en ook in die gemeentes van ons sinodale gebied.

Die Sinodale Diensraad het net onlangs weer met kommer onder die indruk gekom van al die swaarkry en moeilikheid in ons land.  Daar is bykans nie ’n terrein waaroor mense nie praat en selfs kla nie.  Maar omdat ons hoopdraers is en wil wees, betaam dit ons nie om die boodskap wat aan ons toevertrou is, te laat oorheers met ’n negatiewe houding nie.  In plaas daarvan, wil ons eerder die baie liggies wat alreeds skyn en ander wat nog besig is om aan te gaan, opmerk.  Daarom het ons dit goed gedink om te vra hoe ons mekaar positief daarmee kan help.  Ons wil by mekaar leer en mekaar aanmoedig en bystaan; nog meer liggies in mekaar se koppe  laat aangaan.  Die een aspek waarmee ons gedink het ons dalk ’n slag by mekaar kan leer, is om  juis in en om die groter huis- en familiekring te begin.  Berigte van samewerking, kontak op plaaslike vlak, gesamentelike projekte, uitreike en hulp is immers volop.

Hier is die eenvoudige plan: Ons wil graag so gou as moontlik sommer van elke gemeente ’n paar woorde op papier terugkry van wat op grondvlak gebeur om die werkloses, die armes, ander kerke in ons familie, en enigiets waarmee julle besig is en wat mense se lot help verlig.  Op dié manier leer ons by mekaar, en hoef  die wiel nie elke keer weer van vooraf uitgevind te word nie

Ten einde die bal af te skop, hier is so ’n paar goed waarmee ons in Lynnwoodrif besig is.

·                    By ons weeklikse ADVIESSENTRUM (Werkverskaffingsburo) is daar op Woensdae ongeveer 150 werksoekers.  Voornemende werkgewers kom van oral oor uit die stad om veral huishulpe of tuinwerkers te soek.  Verlede week kon maar net 17 persone gehelp word, maar vir dié ‘kliënte’ beteken dit baie.

·                    In die LEES- en SKRYFKLASSE word mense toegerus vir ’n beter lewe. Die enigste handboek is die Bybel.

·                    So ook by die TABITAS, wat vrouens leer om klere te maak.

·                    Ons het vroeër jare al begin met ’n STOFFERINGSMAATSKAPPY in die stad.  Die stoffeerders wat opgelei word, is in staat om ’n eie bestaan te maak, en ook ander mense te evangeliseer.

·                    Ten einde so veel as moontlik lidmate konkreet te betrek, word al die OMGEEGROEPE aangemoedig om by een plek direk by minderbevoorregtes betrokke te wees, veral met opleiding sodat armes kan begin om sélf hulle EIE ARMOEDE te kan begin hanteer

In vennootskap met ander gemeentes, help ons om jongmense se potensiaal te ontwikkel deur byvoorbeeld gereedskap te koop vir die maak van houtkaste ens.