Oostelike Sinode

1 Augustus 2008

GEMEENTES VAN DIE OOSTELIKE SINODE

Liewe Sinode-familie

VOETSOOL SINODESITTINGS

Dit is met groot opgewondenheid dat ons julle nooi na die Voetsool sinodesittings.  Soos in Familienuus van 29 Julie 2008 gesê is, het die Sinodale Diensraad die geleenthede goedgekeur.  Ons voorsien vier Voetsool sinodesittings.  Lees gerus die Weergawe van 2004 se sittings om in die gees van die byeenkomste te kom.

Vanjaar word die indelings van die gemeentes geografies en nie volgens die groottes van die gemeentes gedoen nie.  Ons het aan die prys van petrol gedink en wil ook fokus op sake wat elke gebied raak.  'n Lys van die indeling verskyn aan die einde van die brief.

Die Voetsool sinodesittings vind soos volg plaas:

                        11 Oktober        -        Ermelo

                        25 Oktober        -        Nelspruit

                        1 November      -        Pretoria

                        8 November      -        Witbank

Ons besef dit vind laat in die jaar plaas, maar wil tog die gemeentes vra om moeite vir die een geleentheid te doen.  Dit is 'n baie belangrike en effektiewe manier om die stem van die gemeentes, ja van die lidmate op voetsoolvlak te hoor.

Die Sinodale Diensraad het geoordeel dat elke gemeente minstens vier (4) verteenwoordigers kan stuur.  Julle is natuurlik welkom om meer te stuur.  Vier persone pas egter goed in 'n kar.  Ons vra dat vir elke predikant, daar ook 'n lidmaat gestuur word.  Met ander woorde - moenie vier predikante stuur nie.

Sal julle asseblief julle afvaardiging so stuur dat dit die samestelling van die gemeente weerspieël.  Daarmee vra ons dat vroue, jongmense, werkende mense en bejaardes oorweeg word.  Die geleenthede word spesiaal op 'n Saterdag gehou, sodat die leiersgroep en meningsvormers teenwoordig kan wees.

Ons beoog om by die vorige Voetsool sinodesittings aan te sluit.  Lees gerus die Agendas van ons sinodesittings van 2005 en 2007.

Ons vra dat julle asseblief teen 5 September 2008 sal laat weet hoeveel persone kom en wat hulle name is.  Ons het dit nodig vir die fisiese reëlings.

Die Ontwerpspan beplan dat die geleenthede om 09:00 begin en om 15:00 afgehandel sal wees.

Ons hoor graag van julle.

Baie groete

DS HJ VAN DER SCHYFF

UITVOERENDE AMPTENAAR

VOETSOOL SINODESITTINGS 2008

              Gemeentes in en om Pretoria

              Gemeentes naby Witbank

              Gemeentes naby Nelspruit

              Gemeentes naby Ermelo

Druk      Stuur hierdie nuusartikel na 'n vriend