Oostelike Sinode

Dieselfde engel wat Johannes laat eet het, laat hom nou meet. Die simboliese handeling het dieselfde betekenis as die merk in hoofstuk 7. Johannes beskryf hoe die ongelowiges vir twee en veertig maande lank die gelowiges sal vertrap. Drie en 'n half jaar dui altyd in Openbaring die lyding van gelowiges aan. Dit is die tyd van die twee getuies wat die evangelie verkondig. Hulle het rouklere aan, want hulle treur omdat alle mense nie vir God aanvaar nie. Wat hulle doen, herinner aan Moses en Elia. Met die getuies gebeur dieselfde as wat met Jesus gebeur het – tot deur die dood en opstanding. Toe dit lyk asof daar niks oor is nie en God se vyande bly is, sien almal dat God se Koninkryk nooit tot niet gaan nie. As die sewende engel op sy trompet blaas, word dit bevestig. Die hemelwesens waarvan ons in Openbaring 5:11 lees, bevestig nou dat Jesus die heerser oor die kosmos is. Die vier en twintig dekanse (ouderlinge van Openbaring 4:4) aanbid God. Al die mag behoort aan Hom. Die oordeel oor die wêreld het gekom en sedert Jesus se koms leef alle mense in die tyd van God se verlossing en oordeel. Die eindtyd het aangebreek. Daar is nie meer skeiding tussen God en mense nie. God se tempel is nou waar sy mense is.